درب وحشه البدايه
بعد ماميل للعني يميلون
ولا تنزل دمعتي لغير خدي
ولا امن درب بيه ناس يمشون
درب وحشه البدايه امشيه وحدي
*********
مو كلمن صفن سموه مجنون
ولا كلمن رفع ايده يجدي
فرق ما بين ينطي وبين ينطون
بالحبهم حسافه انطيت جبدي
*********
ندامه الجانوا بحظني يلوذون
اخذوا كل شي زين الجان عندي
عصفور اليغرد هو مسجون
انطاني درس لجل التحدي
*********
الحقيقه اوهام متفيد اليحلمون
ومصيبه البيه حتى بحلمي جدي
لكل جرح الاجه من عنده ممنون
علمني اكابر واحمي حدي
********
انه الشايل فراسه تعادل الكون
وانه الماخذ وراثه عناد جدي
فرزنت الوجوه بكل وجه لون
وايقنت اليخون بلون وردي
********
وايقنت الذنب مو عالينطرون
الامانه بكل صلافة عين تعدي
عمر عشت اني لكمه بحلك ماعون
واول ناب عظني الجان سندي
********
ولان طيب كلت خلهم يشبعون
امل بالله جبير وهو يهدي
كبل مجهول عدوني اليحسبون
صحيح اني جنت مجهول جندي
********
كبل وبكل صعب جانوا يمرون
اظحك عيونهم وعيوني تدي
كبل اكرم مدينه لخاطر عيون
وبحر عالشين جان يفيظ مدي
********
كبل حتى الاليه بظهري يحجون
واعف عنهم واكول الصوج ودي
كل هذا واكول اتحمل اتهون
يادنيه بركبتي حبال شدي
********
انه السامع مثل بالناس يكلون
المطر ميخوف الثوب اليندي
*********.......*********
مما راق لي .......للشاعر اسامه العبيدي
