1 واحد مكلخ دار إيدو ف الما القاطع و دابت ليه. هو يدخل راسو باش يقلب عليها
2 واحد البنت قالت لباها راه واحد ولد الناس بغى يخطبني وما فيه حتى عيب. قال ليها باها واخا، قولي ليه يجي نشوفو
جا الخطيب وجلس مع بات البنت وهو كيمضغ المسكة وهو يقول ليه الراجل: مرحبا بيك أولدي. ولكن واش ما جاتش ف شكل تمضغ المسكة ونتا جاي تخطب؟
قال ليه الشاب: ولكن أ عمي، المسكة ضرورية من بعد ما يكمي الواحد كارو
قال ليه الراجل: هي كتكمي؟
قال ليه الشاب: شوية وصافي، مع شي كويس ديال الشراب
قال ليه الراجل: وزايدها كتسكر؟
قال ليه الشاب: مرة مرة، ملي كنقمر
قال ليه الراجل: وفين كتلعب القمار؟
قال ليه الشاب: ف واحد الكاباري
قال ليه الراجل: ومن إمتى ونتا كتمشي للكاباريهات؟
قال ليه الشاب: من نهار خرجت من الحبس
قال ليه الراجل: وعلاش دخلتي الحبس؟
قال ليه الشاب: حيت ضربت واحد الراجل بالموس وقتلتو
قال ليه الراجل: وعلاش قتلتيه؟
قال ليه الشاب: حيت ما بغاش يجوجني بنتو
قال ليه الراجل: على بركة الله، نجيبو العدول دابا
3 هادا واحد المعلم رسم سباط ف السبورة وسول واحد التلميد: أشنو هادا؟
قال ليه الولد: هباط
سلخو المعلم مزيان وقال ليه: لا هادا سميتو سباط
الغد ليه عاود المعلم رسم سباط وسول نفس التلميد: أشنو هادا؟
عاود قال ليه الولد: هباط
عاود معاه المعلم نفس السيناريو شحال من مرة ولا بغى الولد يحفض هاديك سباط. المعلم طلع ليه الدم، وقال ليه: صافي جيب ليا ولي أمرك
منين جات أم الولد، قال ليها المعلم: شوفي أ لالة، راني عييت مع ولدك... ديما كنرسم ليه هادا وكيقول ليه هباط
بقات المرا تفكر شوية وهي تقول ليه: إيوا أشنو بغيتيه يقول ليك؟ هبرديلة؟
4 واحد مكلخ موصلينو دارهم للمطار. الطريق كامل وهو كيقول: كون غير جبت التلفزة... كون غير جبت التلفزة
مللي وصلوا المطار، دارهم طلع ليهم الدم وقالوا ليه: فرعتي لينا راسنا، علاش زعما تجيب التلفزة؟
قال ليهم: حيت خليت الباسبور فوق منها
5 واحد الطلاب مشى عند واحد مول فران مسموم قال ليه: خويا، سيمانة هادي ما دقت الخبز
قال ليه مول الفران المسموم: راه مداقو هو هو، ما تبدلش
6 واحد مبوق صرفقو صاحبو وهو يقول له: واش بصاح أولا كتفلا؟
قال ليه صاحبو: لا بصاح
قال لي المبوق: مزيان... حيت أنا ما كنحملش التفليات
7 هادا واحد الراجل كان غادي ف الصحرا، راكب حمار ومعاه كلب
وهوما ف الطريق، هدر الحمار وقال للراجل: واش مازال الطريق بعيدة؟
الراجل تصدم وشداتو الخلعة، أو! حمار كيهدر؟ هي مسكون!
ناض الراجل يجري يجري يجري يجري وتابعو كلبو
ملي عيى وهو يوقف.
وتما قال ليه الكلب: وايني خلعة خلعنا هاداك الحمار
8 واحد تالف سول واحد خينا : خويا عافاك أشنو أسرع طريق توصلني لصبيطار؟
قال ليه : غمض عينيك وقطع الشانطي
